هه‌ر وه‌ك ديار كو جيهان د ڕۆژگارا ئه‌ڤرۆ دا د ساته‌وه‌خته‌ك دژوار و خه‌ته‌رناكدا ده‌رباز دبيت، ژبه‌ركو ڤايرۆسێ كورۆنا COVID-19 بوويه‌ نه‌خۆشييه‌ك سه‌رتاسه‌رى و هێرشه‌ك دژواره‌ بۆ سه‌ر ژيانا مرۆڤان. لێ به‌لێ ئه‌ڤ چه‌نده‌ ئه‌وێ يه‌كێ ناگه‌هينت، كو مرۆڤايه‌تى ب ته‌ڤاهى ده‌ستان ژ ژيانێ به‌ربده‌ن و چاڤه‌رێيا مرن يان لاوازبوونێ بكه‌ن، له‌ورا (كاركرن و خۆپاراستن) گه‌شبينى و به‌خته‌وه‌ريێ ل ژيان و مرۆڤايه‌تيێ زێده‌ دكه‌ت و ئاسويێن ديتن و تێرامانێ زه‌لال دكه‌ت. 

ب ئه‌ڤێ مه‌ره‌م و ئارمانجێ زانكۆيا زاخۆ ب خۆشحالى ڕادگه‌هينت، كو ئه‌ڤى كاودانێ نه‌خۆش هيچ كاريگه‌رى و باندۆره‌ك نه‌رێنى ل پرۆسێسا خواندنێ ل زانكۆيا مه‌ نه‌كرييه‌، ژبه‌ركو ستافێ ئه‌كاديميێ زانكۆيێ بۆ ماوه‌يێ پتر ژ سێ سالانه‌ ته‌ڤايا كارێن گرنگ يێن پابه‌ند ب پرۆسێسا خواندنێ وه‌ك (دروستكرنا ئيمێلێن تايبه‌ت ژبۆ قوتابييان، كونتاكتا ئه‌وان ئيمێلان ب سيسته‌مێن زانكۆيێ، ڕاهێنان و فێركرنا قوتابييان و چاوانييا بكارهينانێ، پۆرتالێ قوتابييان، سيسته‌مێ په‌رتووكخانه‌يێ ب شێوازێ ئونلاين ...هتدد) ب ڕێكوپێكى ئاماده‌كرينه‌. ئه‌ڤ چه‌نده‌ ئه‌وێ يه‌كێ دسه‌لمينت كو زانكۆيا زاخۆ وه‌ك زانكۆيێن پێشكه‌ڤتى و ئاست به‌رزێن جيهانێ ئاماده‌كاريێن هه‌ره‌باش كرينه‌ و ژبۆ هه‌ر پێشهاته‌كا نوى د ئاماده‌باشييه‌ك ته‌مام و زانستيدايه‌.

لدووماهييێ گرنگه‌ بێژين، كو به‌شه‌ك ژ ماموستايێن زانكۆيا زاخۆ ب ئاوايه‌كێ فه‌رمى هه‌ر ژ ده‌ستپێكا به‌لاڤبوونا نووچه‌يێ ڤايرۆسێ كورۆنا (COVID-19) ده‌ست ب خواندنا ئونلاين كرينه‌ و وانه‌ ب شێوازێ ڕاسته‌وخۆ پێشكێشى قوتابييان كرينه‌. له‌ورا هه‌گه‌ر بێهنڤه‌دان هاته‌ درێژكرن دێ ل ڕێكه‌ڤتى (1/4/2020) پرۆسێسا خواندنا ئونلاين ب هه‌مى پێداويستيێن لبه‌رده‌ست ب باشترين شێواز بۆ قوتابييان ده‌ستپێكه‌ت.